Café Sumut misilittagalimmik attartorneqassaaq

Timmisartoqarfimmi terminalimi nutaami Café Sumut naammassinissaa qanilliartorpoq. Café Sumut Erik Brogaard-imit, ilaatigut café-nik aamma Kamik Købmandshandel-imik ingerlatsisumit, ingerlanneqassaaq, aammalu Erik timmisartoqarfimmi angalasorpassuit tikilluaqqunissaannut qilanaarpoq.

Café-mi nerisassat allassimaffianniittut assigiinngisitaassapput aammalu nunatsinni nunanilu tamalaani angalasunut iluaqusiissallutik. Nerisassat allassimaffianiittut ullup ingerlanerani allanngortassapput, ullaakkut ullaakkorsiuteqarluni sandwich-eqarlunilu aammalu ullup qeqqata nalaani kingornanilu kissartunik nerisassaqartassalluni. Tassani aamma kissartunik nillertunillu imeruersaatissanik qinigassaqassaaq.

Sanaartorlutik suliaqartut teknikerillu sapaatit akunnerini ingerlasuni ammarnissamut piareerniarlutik annertuumik sulipput. Tamatuma tungaanut ullaaralaamiit aammalu ullup qeqqata siorna aqqarnup missaata tungaanut Nuummi terminalimi ullaakkorsiutissanik akeqanngitsunik sassaallertassaagut.