Nuummi Timmisartoqarfimmi security-p niveau-3-mut inissikkallarneqarneqarnera

Aaasinng 19. agg 2024 

Sapaatip akunnerani kingullermi Trafikstyrelsen misissuilluni takusaanerata nalaani isumannaallisaanermut tunngatillugu kukkunerit amigaatillu nassaarineqarput, ajoraluartumik isumannaallisaanerup niveau 2-miit 3-mut inissikkallarneqarneranik kinguneqartumik.

Tamatuma kingunerisaanik – maannakkorpiaq – Nuummiit assersuutigalugu Keflavik-imut (Island) imaluunniit Iqalunnut (Canada) Nuummiit toqqaannartumik nunanut tamalaanut timmisartuussisoqarsinnaajunnaarpoq. Nunap iluani timmisartuussinerit allanngunngillat.

Kukkunerit nassaarineqartut assersuutigalugu tassaapput matut paarnaarneqanngitsut aammalu sumiiffinnut iserfigeqqusaanngitsussanut akuerineqarani isertoqarsinnaanera.

Pissutsit aaqqiivigineqarnissaannut atorunnaarsitsigallarneq tassani pineqarpoq.

Kukkunerit sapaatit akunneranni 36-mi ilursineqassasut Greenland Airportsip naatsorsuutigaa, tassani Trafikstyrelsen nakkutilliiartoqqittussaalluni.

Ajoraluartumik tamanna ilimagineqaqqaartuniit kingusinnerulaarpoq. Tamatumunnga ilaatigut pissutaavoq, iluarsiinissat pisariaqartut ilaanni immikkut ilisimasallit, piffissaq sivisunerulaartoq atorlugu apuunniartussat, pisariaqartinneqarnerat.

– Kukkunerit iluarsinissaat aallullugu suliaraagut, taamaalilluta isumannaallisaaneq annertuumiiteqqilersinnaaniassagatsigu aammalu nunanut allanut timmisartuusseqqissinnaalerniassagatta. Sullitatsinnut ilaasunullu tamatuma akornusiinera ajuusaarutigisorujussuuarput, oqarpoq Greenland Airportsimi attaveqaqatigiinnermut pisortaq Mikkel Bjarnø Lund.

Tamatuma tungaanut Nuummiit nunanut allanut timmisartuussinissanut, security aqqusaartinniarlugu, assersuutigalugu Kangerlussuarmut imaluunniit Kulusummut aqqusaarluni minnissaq pisariaqarpoq.

Greenland Airportsip tamatuma aaqqiiviginissaanut, taamaakkaluartorlu ilaasut tamarmik ornigassaminnut apuunniarnissaat qulakkeerniarlugu timmisartuutileqatigiiffiit qanimut oqaloqatigai.